UKA 2001 / 33
Peqqussutissatut siunnersuummut oqaaseqaatit
Nalinginnaasumik oqaaseqaatit
1. januar 2002 aallarnerfigalugu atuutilissapput inissianik attartorneq pillugu Inatsisartut peqqussutissaat nr. 5, 31. maj 2001-imeersoq aamma inissiani attartortittakkani ineqarnermut tapiissutit pillugit Inatsisartut peqqussutissaat nr. 3, 31. maj 2001-imeersoq.
Peqqussutissatut siunnersuutip ininik attartornermut akiliutip iluarsartuussiffigineqaqqinnissaanut ikorfartuisussanik malittarisassiornissaq periarfissiivigissavaa, matuma ataani ineqarfiit immikkoortortaqarfiinni akiviusunik immikkoortortanullu kisimik tunngasunik aningaasatigut siumut missingersuusiortarnissamut malittarisassiornissaq periarfissiivigissallugu. Taakkua ilaatigut ineqarnermut akiliummut tapiissutinik nutaamik aaqqissuussinissamut atugassanik unneqqarissumik ininik attartornermut akiliutinik paasissutissiisarnissaq tunngavissiivigissavaat. Aammattaaq siunnersuutip qulakkeerivigissavaa ineqarfiit immikkoortortaqarfiisa naatsorsuutaasa naammattumik kukkunersiorneqartarnissaat.
Peqqussutissatut siunnersuut tusarniaassutigineqarsimanngilaq inatsisissanilli nalilersuisartunit nalilersorneqarsimalluni. Naatsorsuutigineqanngilaq peqqussutissatut siunnersuutip allaffissornermut kinguneqarumaarnissaa. Nunatta aningaaserivianut kommuuninulluunniit aningaasatigut kinguneqarumaarnissaa naatsorsuutigineqanngilaq.
Aalajangersakkanut ataasiakkaanut oqaaseqaatit
§ 1, nr. 1-imut
Aalajangersakkami siunnersuutigineqarpoq Namminersornerullutik Oqartussat kommuunillu inissiaataasa attartortittakkat qanoq aqunneqarnissaannut Naalakkersuisut malittarisassiorsinnaanissamut ammaavigineqarnissaat. Attartortut toqqammavigisinnaasaannik peqatigitillugulu aamma ilaatigut aningaasatigut siumut missingersuusiortarnissamut naatsorsuutinillu saqqummiussisarnissamut taamaaqatigiimmik erseqqissumillu periaaseqarnissamut erseqqissunik malittarisassaqarnissaa pissusissamisuussangatinnarpoq, apeqqutaatinnagu inissiat kiap aqutarinerai aammalu inissiat sumi inissisimanersut.
Aammattaaq siunnersuutip aqutsinermut akileeqataassutip akileeqataassummut akiliummullu immikkoortinneqartalernissaat ammaavigissavaa, taakku attartukkamut ataatsimut, inigisap m2-kkaarluni angissusianut imaluunniit pisumut ataatsimut annertussusiliivigineqarsinnaasalersillugit. Sullissinerit assigiinngitsut attartortunut tamanut atuuttut akileeqataassutikkut akilersinniarneqartassapput sulissinerilli aalajangersimasut immikkoorluinnartut attartortunut ataasiakkaanut tunngassuteqartut akiliutikkut akilersinniarneqartassallutik.
§ 2-mut
Aalajangersakkami siunnersuutigineqarpoq peqqussutissatut siunnersuut inissianik attartorneq pillugu Inatsisartut peqqussutaat nr. 5, 31.maj 2001-imeersoq peqatigalugu atuutsinneqalernissaa.